ANG PUNO NG MIYOK
“Ang lahat ay dapat na nasa kanila ng mga tent pagsapit ng alas-diyes ng gabi” kabilin-bilinan ni Bb. Villaluz sa kanyang mga mag-aaral.
Ang mga mag-aaral ng ikaanim na baitang ay nagkaroon ng exposure trip sa Antipolo, Rizal. Doon ay tinuturuan ang bawat mag-aaral kung anu-ano ang mga paraan sa pagpapanatili ng kagandahan ng kalikasan.
“Buti na lang nakasama ako sa field trip natin na ito. Bukod sa masaya ay marami pa akong natututunang paraan upang maisalba ang ating kalikasan” banggit ni Tom sa kanyang kaibigang si Jerry.
“Oo nga, ito talaga ang pakay ko dito” sagot ni Jerry
“Pakay? Anong ibig mong sabihin?”
“Mamayang gabi sa loob ng ating tent ay sasabihin ko sa iyo.”
Pagkatapos maghapunan ay dumiretso na ang magkaibigan sa kanilang tent. Nang patayin na ang mga ilaw ay may inilabas si Jerry na isang bagay. Gamit lamang ang kanilang mga gasera ay inaninag ng magkaibigan ang kakaibang bagay na ito na hawak ni Jerry.
“Ano iyan?” Pagtatanong ni Tom.
“Ito ay ang dahon ng puno ng Miyok.”
“Miyok? Ngayon lang ako nakarinig ng ganyang klase ng puno.”
“Oo, dahil ang dahon na ito ay hindi galing sa planetang ito.”
“Ha? Ang ibig mong sabihin ay galing pa iyan sa ibang planeta?” hindi makapaniwalang pagtatanong ni Tom.
“Totoo ang sinasabi ko. Kung ayaw mong maniwala ay patutunayan ko ito sa iyo.” Pagkasabi nito ay may inilabas si Jerry sa kanyang bulsa na bilugang bagay na halos kasing laki ng bola ng baseball. May lumabas ditong nakasisilaw na liwanag at matapos ang ilaw na iyon ay nagulantang si Tom sa kanyang nakita.
“Nasaan na tayo?” Pupungas-pungas pang wika ni Tom.
“Tayo ay nasa planetang Gargon.”
“Ganoon ba. Puro pala disyerto ang planetang ito at walang katau-tao.”
“Oo, namamatay na ang aming planeta, malungkot na wika ni Jerry”
“Paanong namamatay na ito?”
“Namamatay na ang aming planeta dahil na din sa pagpapabaya ng mga naninirahan dito. Sa pagsulong ng aming teknolohiya at agham ay hindi namin napansin ang unti-unting pagkawasak ng aming kalikasan. Ang dahon na iyan na hawak mo ay ang kaisa-isang puno na natitira sa aming planeta. Ito ang puno ng Miyok. Kaya ako nagpunta sa inyong mundo ay para malaman ko kung ano ang maari pang gawin naming mga naninirahan sa planetang ito upang maisalba ang aming kalikasan.”
“Marami ka bang nakuhang ipormasyon?”
“Napakarami! Bukas na bukas din ay sisimulan ko na ang mga proyektong ito.”
“Sana nga maging matagumpay ang iyong mga balak para maisalba mo ang inyong planeta.”
“Sa tulong na ibinigay ng mga tao sa inyong mundo ay madali kong magagawa ang iyong mga tinuran. Paalam sa iyo kaibigang. Mananatili na ako dito sa aking lupang sinilangan. Kailangan nang magtuturo sa mga naninirahan sa aming planeta kung paano maisasalba ang aming natitirang kalikasan.”
“Mag-iingat ka kaibigan’ Pagpapaalam ni Tom kay Jerry.
Kinaumagahan ay nagising si Tom sa tunog ng silbato ni Bb. Villaluz. PRRRRT!!! PRRRRT!!
“Umaga na pala. Kay gandang panaginip. Ako ay naglakbay sa ibang planeta sa isang kisap mata lamang. Hahahaha, hindi kapanipaniwalang panaginip.”
Iiling-iling pa si Tom habang natatawa sa kanyang sarili. Sa pagtayo niya mula sa kanyang hinihigang kuna ay may nakapa siyang isang bagay. Ito ay walang iba kung hindi ang dahon ng puno ng Miyok.